नेपाली कांग्रेसका सभापति शेरबहादुर देउवाले कोरोना रोकथाम तथा नियन्त्रण गर्न प्रधानमन्त्री केपी शर्मा ओलीको ध्यानाकर्षण गराएका छन्।पार्टीका नेताहरूसहित आज सिंहदरबार पुगेका देउवाले प्रधानमन्त्री ओलीलाई १५ बुँदे ध्यानाकर्षण पत्र बुझाएका हुन्।
पत्रमा देउवाले कोरोना फैलिनुमा सरकारको चरम लापरवाही रहेको बताएका छन्। ‘यस्तो परिस्थिति आउनुमा सरकारको चरम लापरवाही, संवेदनहीनता र अर्कमण्यता जिम्मेवार छ। सरकार न विगतका गल्तीबाट सिक्छ न कांग्रेस तथा अन्य सरोकारवालाहरूले दिएको सुझाव र सल्लाह आत्मसाथ गर्छ,’ देउवाले भनेका छन्।
कोभिड संकट व्यवस्थापन केन्द्रको नेतृत्व अपारदर्शी, सतही र असक्षम सावित भएको छ,’ देउवाले भनेका छन्, ‘कोरोनाको पहिलो चरणमा देखिएको चरम भ्रष्टाचार, दुरूपयोग र भेदभावको पुनरावृत्ति अहिले पनि देखिन थालेको छ।’
सरकारसँग राज्यको स्रोत साधन र संयन्त्र भए पनि जनताका पक्षमा प्रभावकारी काम नगरेको देउवा बताउँछन्। कोरोना संकटका बेला गम्भीर भएर काम गर्न पनि उनले माग गरे।
सबै नागरिकलाई खोप लगाउन देउवाको माग छ। अस्पतालहरूमा शय्यादेखि अक्सिजनलगायत सामग्री व्यवस्थापन गर्न सरकारले जोड दिनुपर्ने देउवाले उल्लेख गरेका छन्।
