बैतडीमा जीप दुर्घटनामा थप एक जनाको मृत्यु भएको छ। आइतबार दिउँसो सिगास गाउँपालिका-३ का ४५ वर्षीय जयसिंह धामीको मृत्यु भएको हो। योसँगै आइतबार बिहान भएको उक्त दुर्घटनामा मृत्युको संख्या ३ पुगेको छ। बैतडीबाट डडेल्धुरातर्फ आउँदै गरेको से १ ज ७३९ नम्बरको जीपमा  सवार १६ मध्ये ११ जना घाइते छन्।

जिल्ला प्रहरी कार्यालय बैतडीका सूचना अधिकारी दर्शन खड्काले जीप साहु र चालक भने अहिले फरार रहेको बताए। प्रहरीले उनीहरूको खोजी गरिरहेको छ। घाइतेहरूलाई उपचारका लागि डडेल्धुरा अस्पताल ल्याइँदै छ।