नेकपा एमालेका अध्यक्ष केपी शर्मा ओलीले देउवा सरकार कवाडीका सामान बटुलेर बनाएको टालटुले सरकार भएको टिप्पणी गरेका छन्।च्यासलमा आफू पक्षीय केन्द्रीय कमिटी बैठकमा उनले देउवाले लिएको विश्वासको मत कवाडीको रिसाइलकबाट भाँडाकुँडा बटुलेर बनेको टालाटुली बटुली कति राम्री पुतली भन्ने खालको सरकार भएको टिप्पणी गरेका हुन्।
हामीले १० बुँदे सहमति स्वीकार गरेका थियौँ। माधव नेपालले मानेनन्। हिजोसम्म बैठकमा आउन आह्वान गरेका थियौँ तर आएनन्। कोटेश्वर घरै पुगेका कार्यदलका सदस्यहरुलाई अल्पमतको बैठकमा म जान्न भनेर पठाएछन्। भीम रावलहरुले देउवालाई विश्वासको मत नहालौँ, पार्टी एकतावद्ध बनाउ भन्दा म विधि निर्णय मान्दिनँ, एक्लै भएपनि मत हाल्छु भनेर हप्काएर पठाएछन्’ ओलीले भने।
बैठकमा ओलीले नेता भीम रावललाई राजीनामा फिर्ता लिन आग्रह गरेका थिए। बैठकले गद्दारी गरेको आरोपसहित फ्लोर क्रस गर्ने २२ जना सांसदलाई २४ घण्टे स्पष्टीकरण सोध्ने निर्णय गरेको छ। नेता माधवकुमार नेपालसहित शेरबहादुर देउवालाई विश्वासको मत दिनेहरुलाई गुटबन्दीको महारोगको नेतृत्व गरेको आरोप लगाउँदै स्पष्टीकरण सोध्ने निर्णय बैठकले गरेको हो।
बैठकले गल्ती स्वीकार गरेर आउनेहरुलाई अन्तिम अवसर दिने निर्णय पनि गरेको छ। साथै बैठकले कार्यदलको १० बुँदे समझदारीलाई अनुमोदन समेत गरेको छ।
सरकारले जनविरोधी काम गर्ने र आफूहरूमाथि षड्यन्त्र र हमला हुन सक्ने अनुमान गरेको उनले बताएका थिए। उनले आवश्यकताअनुसार सबै विषयमा प्रतिवाद गर्न तयार रहन केन्द्रीय कमिटीका नेताहरूलाई निर्देशनसमेत दिएका थिए।
भीम रावलले सांसद पदबाट दिएको राजीनामाप्रति असन्तुष्ट देखिएका उनले त्यसलाई पुनर्विचार गर्न भनेका थिए। बैठकमा उनी कांग्रेस, माओवादी र माधव नेपालप्रति आक्रोशित बनेका थिए। आजको बैठकले प्रधानमन्त्री शेरबहादुर देउवालाई विश्वासको मत दिने २२ सांसदलाई स्पष्टीकरण सोध्ने निर्णय गरेको छ। यस्तै, बैठकले कार्यदलको १०बुँदे सहमतिलाई अनुमोदन गरेको छ।
