काठमान्डौ: १४ बैशाख ।
भारतमा कोरोना फैलिएपछि स्वदेश फर्किएका नेपाली विनापरीक्षण सीधै घर पुग्ने गरेका छन् । भारतबाट आएकालाई राख्ने क्वारेन्टिन नहुँदा उनीहरू सीधै गाउँघर पुग्ने गरेका हुन् ।
भारतमा कोरोना संक्रमण बढेपछि रोजगारी गुमाएर नेपाल आएका नेपाली गाउँमा आएर घरमा नै बस्ने गरेको सुर्खेत चौकुने गाउँपालिका– ५ का रामबहादुर विष्टले बताए । ‘कोरोना संक्रमित भए–नभएको थाहा छैन । तर, भारतबाट नेपाल आएकाहरू अहिले गाउँमा आएर घरमा नै बस्ने गरेका छन्,’ उनले भने, ‘क्वारेन्टिन र चेकजाँचको व्यवस्था नहुँदा समुदायमै कोरोना संक्रमण भयावह हुने जोखिम देखिएको छ ।’
सुर्खेतको बराहताल गाउँपालिकाका अध्यक्ष तेजबहादुर बस्नेतले भारत तथा अन्य देशबाट आएका नागरिकलाई घरमा नै सुरक्षित तरिकाले बस्न भनिएको बताए । ‘अघिल्लोपटक हामीले क्वारेन्टिनमा राख्ने गरेका थियौँ । भारत तथा अन्य मुलुकबाट आएका नागरिक त्यहीँ बस्ने गरेका थिए,’ बस्नेतले नयाँ पत्रिकासँग भने, ‘यसपटक घरमा नै निश्चित समयसम्म घरमा नै सुरक्षित बस्न भनेका छौँ । बिरामी वा कोरोनाका लक्षण देखिएमा खबर गर्न आग्रह गरेका छौँ ।’
कर्णाली प्रदेश सरकारले बाहिरबाट आउनेलाई व्यवस्थापन गर्न स्थानीय सरकारलाई नै अपिल गरेको छ । तर, स्थानीय सरकारले क्वारेन्टिन र आइसोलेसन नबनाउँदा अवस्था जोखिमपूर्ण बनेको जिल्ला स्वास्थ्य कार्यालयका चेतनिधि वाग्लेले बताए । सुर्खेतमा पछिल्लो समय एक सय ९९ कोरोना संक्रमित पाइएकोमा एक सय ८४ होम आइसोलेसनमा छन् । १६ जना कर्णाली प्रदेश अस्पताल सुर्खेतमा उपचाररत रहेको कर्णाली प्रदेश अस्पतालका कोरोना फोकलपर्सन डा. केएन पौडेलले जानकारी दिए ।
