आज बडादसैँ—राष्ट्रिय एकता र संस्कृतिको प्रतीक
आज असोज शुक्ल दशमी, नेपालीहरूको महान् चाड बडादसैँको पवित्र दिन हो। विजयादशमीका नामले पनि चिनिने यो दिन असत्यमाथि सत्यको विजय र अधर्ममाथि धर्मको विजयी भावनासँग जोडिएको छ। घर-घरमा टीका–जमरा लगाइने, आशीर्वाद ग्रहण गरिने र परिवारजनको पुनर्मिलन हुने यस पर्वले नेपाली समाजलाई एकै मालामा गाँस्ने काम गरेको छ।
दशैँ केवल धार्मिक पर्व मात्र होइन, यो सांस्कृतिक एकता र सामाजिक सद्भावको प्रतीक पनि हो। गाउँदेखि शहरसम्म, हिमालदेखि तराईसम्म, प्रत्येक नेपालीले आफ्नो परम्परा र आस्थाअनुसार यसलाई आत्मीयतापूर्वक मनाउँछन्। यस पर्वले परिवारको महत्व, नातागोताको मजबुत सम्बन्ध र आपसी प्रेमलाई अझ गहिरो बनाउने अवसर प्रदान गर्दछ।
यद्यपि, बडादसैँलाई मात्र उत्सवको नाममा विलासिता र अपव्ययसँग जोड्ने प्रवृत्ति बढ्दै गएको छ। ऋण लिएर भए पनि धूमधाम गर्ने, उपभोगवादमा फस्ने, सामाजिक प्रतिस्पर्धामा रमाउने अभ्यासले यस पर्वको मौलिकता र धार्मिक–सांस्कृतिक मूल्य ओझेलमा पारीरहेको छ। हामीले स्मरण गर्नुपर्छ—दशैँको आत्मा सादगी, आस्था र परिवारसँगको आत्मीयतामा निहित छ, बाह्य चमकधमकमा होइन।
आजको दिनमा हामीले दशैँलाई सकारात्मक सोच, सामाजिक मेलमिलाप र राष्ट्रिय एकतालाई बलियो बनाउने पर्वको रूपमा पुनः स्मरण गर्न आवश्यक छ। धार्मिक आस्था जगेर्ना गर्नुका साथै आधुनिक समाजमा बढ्दै गएको विभाजन, असमानता र वैमनस्यतालाई हटाउँदै सहकार्य र सहिष्णुताको सन्देश दिन सकियो भने मात्र दशैँको वास्तविक महत्त्व जगेर्ना हुन्छ।
यस विजयादशमीले सम्पूर्ण नेपालीमा शान्ति, समृद्धि र आपसी एकताको भावना फैलाओस् भन्ने शुभकामना।