सम्पादकीय | टपटेन खबर
बडादसैँ अर्थात् विजयादशमी नेपाली समाजको महत्त्वपूर्ण सांस्कृतिक तथा धार्मिक पर्व हो। असत्यमाथि सत्य, अन्यायमाथि न्याय र अधर्ममाथि धर्मको विजयको प्रतीकका रूपमा मनाइने यस पर्वले नेपाली समाजमा पारिवारिक एकता, आपसी सद्भाव, प्रेम र सहिष्णुताको सन्देश प्रवाह गर्दै आएको छ। आज विजयादशमीको पावन अवसरमा स्वदेश तथा विदेशमा रहनुभएका सम्पूर्ण नेपाली दाजुभाइ, दिदीबहिनी, बुवाआमा तथा इष्टमित्रहरूमा सुख, शान्ति, समृद्धि, सुस्वास्थ्य र उत्तरोत्तर प्रगतिको हार्दिक मंगलमय शुभकामना व्यक्त गर्दछौँ।
दसैँ केवल टीका, जमरा, नयाँ लुगा र मीठोमसिनो खाने पर्व मात्र होइन। यो आत्मीयता नवीकरण गर्ने, टाढिएका आफन्तसँग सम्बन्ध जोड्ने, ठूलाबडाबाट आशीर्वाद लिने र आपसी मनमुटाव अन्त्य गर्ने अवसर पनि हो। यस पर्वले परिवारमा खुसी, समाजमा एकता र राष्ट्रमा शान्ति तथा समृद्धिको आधार बलियो बनाउन सकोस् भन्ने हाम्रो कामना छ।
तर चाडपर्वको वास्तविक खुसी केवल व्यक्तिगत उत्सव र उपभोगमा सीमित हुनुहुँदैन। आर्थिक असमानता, बेरोजगारी, गरिबी, भ्रष्टाचार र सामाजिक विभेदका कारण लाखौँ नेपालीका लागि दसैँ अझै सहज र उल्लासमय बन्न सकेको छैन। कोही परिवारसँग भेटघाट गर्दै खुसी साटिरहेका छन् भने कोही रोजगारीको खोजीमा विदेशमा बसेर घरपरिवार सम्झिरहेका छन्।
कतिपय परिवारलाई दैनिक छाक टार्नै कठिन छ। त्यसैले दसैँको खुसी समाजका सबै वर्गसम्म पुर्याउने दायित्व हामी सबैको हो।
दसैँको अर्को महत्त्वपूर्ण सन्देश करुणा, मानवता र अहिंसा हो। चाडपर्वको नाममा अनावश्यक खर्च, देखासिकी, मदिराको दुरुपयोग, जुवातास तथा पशुपक्षीमाथिको क्रूरतालाई प्रोत्साहन गर्नु उचित हुँदैन। धार्मिक आस्था व्यक्तिगत स्वतन्त्रताको विषय हो, तर आस्थासँगै करुणा र विवेकलाई पनि स्थान दिनुपर्छ। बोल्न नसक्ने प्राणीको पीडा बुझ्नु, जीवप्रति दया राख्नु र सम्भव भएसम्म हिंसारहित उत्सव मनाउनु सभ्य समाजको पहिचान हो। दसैँलाई प्रेम, सद्भाव र अहिंसाको संस्कृतिसँग जोड्न सके यसको महत्त्व अझ बढ्नेछ।