युवा साहित्यकार डा. रमेश शुभेच्छुलाई नागार्जुन बाङ्मय जदौ पुरस्कार

दाहाल यज्ञनिधिका ७२ औँ जन्मजयन्तीका अवसरमा एक विशेष समारोहका बिच युवा साहित्यकार डा. रमेश शुभेच्छुलाई नागार्जुन बाङ्मय जदौ पुरस्कार २०७२ समर्पण गरेको खबर छ । पुरस्कारको राशी नगद १५०१५ रहेको प्रतिष्ठानका अध्यक्ष दिल पौडेलले बताउनुभयो ।
नागार्जुन वाङ्मय प्रतिष्ठानका अध्यक्ष दिल पौडेलको अध्यक्षता र साहित्यकार, प्राज्ञ डा. तुलसी भट्टराईका प्रमुख प्रमुख आतिथ्यमा सम्पन्न समारोहमा सो पुरस्कार नागार्जुन वांगमय प्रतिष्ठानले यसै वर्षदेखि दिन थालेकोकुरा प्रतिष्ठानका सचिव युवराज नास्तिकले बताउनुभयो । साहित्यकार डा. रमेश शुभेच्छुले दाहालका कृतिको खोज गरी उहाँको जीवनी व्यक्तित्व र कृतित्वलाई बाहिर ल्याउ खेलेको भूमिका उल्लेख्य रहकाले उहाँलाई पुरस्कृत प्रतिभाका रुपमा छनोट गरिएको छनोट समितिका संयोजक मातृका पोखरेलले बताउनुभयो । नगद पुरस्कारसहित प्रमाणपत्र प्रमुख अतिथि डा. भट्टराईले अर्पण गर्नुभयो । भट्टराईले प्रमुख अतिथिका रुपमा समारोहलाई सम्बोधन गर्दै शुभेच्छुले दाहाल र अरु स्रष्टाका लागि पनि मोतीरामको भूमिका निर्वाह गरेकामा दाहालप्रति गरेको कामको कदर भएको बताउनुभयो । उहाँले शुभेच्छुको सक्रियताको पनि चर्चा गर्दै प्रतिष्ठानले सही पात्र छनोट गरी पुरस्कृत गरेको बताउनुभयो । उहाँले थप्नुभयो, कुनै पनि पुरस्कार दिँदा पहिलो प्रतिभा योग्य भएपछि पुरस्कारको गरिमा पनि उत्तरोत्तर बढ्दै जाने परम्परा छ ।
कार्यक्रममा साहित्यकार प्रा. प्रयागराज वाशिष्टले दाहालका कविताबारे र डा. विनोद मञ्जनले दाहालका निबन्धका बारेमा समीक्षा प्रस्तुत गर्नुभयो । भट्टराईले दाहाल परिवर्तन पक्षधर कवि भएको बताउनुभयो । अर्का वक्ता डा. मञ्जनले दाहालका केही निबन्ध निबन्ध कलाका दृष्टिले कमजोर भए पनि विचारका दृष्टिले अग्रगामी भएको निष्कर्ष प्रस्तुत गर्नुभयो । डा. हरिप्रसाद सिलवालले पुरस्कृत प्रतिभा डा. रमेश शुभेच्छुको परिचय दिने क्रममा उहाँ सिर्जना समीक्षा, संगठन, पाठ्यपुस्तक लेखन र साहित्यिक पत्रकारिताका बहुआयामबाट सक्रिय प्रतिभा हुनुहुन्छ र उहाँलाई यो पुरस्कार नदिएको भए अन्याय हुने थियो भन्ने मत राख्नुभयो ।
कार्यक्रममा प्राज्ञ अगिव वनेपाली, पत्रकार यशोदा अधिकारी, पुरस्कार अक्षयकोश संस्थापक सुधा दाहाल, साहित्यकार महेश प्रसाईं, साहित्यिक पत्रकार रामप्रसाद पन्तलगायतले दाहालका जीवनी व्यक्तित्व र कृतित्वको परिचय दिनुभयो । समारोहमा सम्मानित प्रतिभा डा. रमेश शुभेच्छुले पनि मन्तव्य व्यक्त गर्नु भएको थियो।
समारोहमा देवु लुइटेलले दाहालका छ वटा कविता प्रस्तुत गर्नुभएको थियो भने कवि रत्ननिधि रेग्मी शुक्राचार्य, असीम सागर, कृष्णप्रसाद जस्ताघरे, युवराज कुनाघरे, रामदेव पाण्डे, गौरी दाहाल, गङ्गा खतिवडालगायत कविले दाहाल विषयक कविता वाचन गर्नुभएको थियो । नागार्जुन प्रतिष्ठानको हरेक शृङ्खलामा समीक्षकलाई सम्मान गर्ने नियमअनुसार समीक्षकद्वय प्रा. प्रयागराज वाशिष्ट र डा. विनोद मञ्जनलाई सम्मान पनि गरिएको थियो ।
कार्यक्रममा कवि पूर्ण विरामका दुई कविता वाचन भएका थिए । तीमध्ये एएटा कविताको प्रभावकारी वाचनका लागि रु १००० नगद सहित यम बाँस्तोला पुरस्कृत हुनुभयो भने । श्रष्टा विशेष कविता वाचनमा दाहालका कविता वाचन गरेर देवकुमारी लुइटेल पनि प्रसंशा पत्रद्धारा सम्मान गरिएको थियो ।
यज्ञनिधि दाहालको जन्म २०१० साल श्रावण ८ गते खोटाङको खाल्लेमा भएको थियो ।