काठमाण्डौ । श्रीलंकाको कोलम्बो उच्च अदालतले बिहीबार अपदस्थ राष्ट्रपति गोटाबाया राजपाक्षेको सरकारका दुई पूर्वमन्त्रीलाई ऐतिहासिक भ्रष्टाचारको मुद्दामा जेल सजाय सुनाएको छ । पूर्वखेलकुदमन्त्री महिन्दानन्द अलुथगामगे र पूर्वव्यापारमन्त्री अनिल फर्नान्डोलाई कोलम्बो उच्च राज्यकोषको पाँच करोड ३० लाख रुपैयाँ (एक लाख ७७ हजार डलर) दुरुपयोग गरेको मुद्दामा दोषी ठहर गर्दै सजाए सुनाएको हो।
गोटाबायाका जेठा दाइ महिन्दा राजपाक्षेको सन् २०१५ को पुनःनिर्वाचनको असफल प्रयासलाई बढावा दिने प्रयासमा १४ हजार क्यारम बोर्ड र ११ हजार ड्राफ्ट सेटसहित बोर्ड गेम दान गर्न सरकारी पैसा प्रयोग गरेकामा उनीहरूलाई दुई हजार डलर जरिवाना गरिएको छ।
अलुथगामागेलाई २० वर्षको जेल सजाय सुनाइएको छ भने फर्नान्डोलाई २५ वर्षको सजाय सुनाइएको हो । अलुथगामागे अहिले भ्रष्टाचारको आरोपमा सफलतापूर्वक मुद्दा चलाइएको राजपाक्षे नेतृत्वको मन्त्रिमण्डलका सबैभन्दा वरिष्ठ सदस्य हुन्।
राजपाक्षे दाजुभाइहरू सत्ताबाट बाहिरिएपछि ६ वर्षअघि दुवै जनाविरुद्धको मुद्दा सुरु भएको थियो, तर गत वर्ष नयाँ सरकार गठन नभएसम्म यो मुद्दा सुस्त गतिमा अघि बढेको थियो।
अलुथगामागेले सन् २०२२ मा एक चिनियाँ आपूर्तिकर्तालाई ६० लाख नौ हजार डलरको भुक्तानी गर्न अनुमति दिएको आरोपको छुट्टै अनुसन्धानको पनि सामना गर्नुपरेको छ।
सन् २०२० मा उनले श्रीलंकाको राष्ट्रिय क्रिकेट टोलीलाई सन् २०११ को विश्वकप फाइनलमा भारतका पक्षमा धाँधली गरेको आरोप लगाएपछि अनुसन्धान सुरु भएपनि अन्ततः उनको दाबी प्रमाणित गर्न असफल भयो ।
सन् २०१० देखि २०१५ सम्म खेलकुदमन्त्रीका रूपमा काम गरेका अलुथगामागेले सन् २०२० जुनमा आफूले त्यस समयमा कथित म्याच फिक्सिङको षड्यन्त्र ‘खुलासा गर्न नचाहेको’ बताएका थिए।
‘सन् २०११ मा हामीले जित्नुपर्ने थियो, तर हामीले खेल बेचेका थियौँ। मलाई लाग्छ- म अहिले यसबारे कुरा गर्न सक्छु। म खेलाडीहरूलाई समावेश गरिरहेको छैन, तर केही वर्गहरू संलग्न थिए’, उनले भने।
मुम्बईको वानखेडे स्टेडियममा भएको फाइनलमा श्रीलंका ६ विकेटले हारेको थियो। भारतीय र श्रीलंकाका दुवै टिमका खेलाडीले आफूहरूले कुनै पनि गलत काम नगरेको कुरा बताउँदै आएका छन्।