काठमाडौँ, कात्तिक २३ ।
परराष्ट्रमन्त्री शिशिर खनालले संयुक्त राष्ट्रसङ्घीय जलवायु परिवर्तनसम्बन्धी पक्ष राष्ट्रहरूको ३१औँ सम्मेलन (कोप–३१) का अवसरमा इथियोपियाका विदेशमन्त्री गेडियन टिमोथियोससँग द्विपक्षीय भेटवार्ता गर्नुभएको छ।
भेटका क्रममा परराष्ट्रमन्त्री खनालले जलवायु परिवर्तनका कारण नेपालमा हालै भएका विनाशकारी विपद्पछि नेपालप्रति सहानुभूति र ऐक्यबद्धता व्यक्त गरेकोमा इथियोपिया सरकार तथा त्यहाँका जनताप्रति आभार व्यक्त गर्नुभयो।
उहाँले समानता, साझा वातावरणीय उत्तरदायित्व र बहुपक्षीय साझेदारीमा आधारित विश्वव्यापी जलवायु कार्यलाई कोप–३१ तथा इथियोपियाको आगामी कोप अध्यक्षताका क्रममा थप प्रभावकारी रूपमा अघि बढाउन नेपाल प्रतिबद्ध रहेको बताउनुभयो।
भेटमा नेपाल र इथियोपियाबीचको मैत्रीपूर्ण तथा सहयोगात्मक सम्बन्धलाई थप सुदृढ बनाउने विषयमा पनि छलफल भएको थियो।