काठमाडौं । युरोपेली सङ्घको जलवायु निगरानी निकायका अनुसार मार्च महिनामा महासागरको तापक्रम झण्डै रेकर्ड स्तरमा पुगेको छ, जसले पृथ्वीको तापक्रम अझ बढ्ने संकेत दिएको छ। यसले अत्यधिक गर्मी र चरम मौसमीय घटनाहरू बढ्न सक्ने चेतावनीसमेत दिएको छ।
प्रतिवेदनअनुसार मार्चमा समुद्री सतहको औसत तापक्रम करिब २०.९७ डिग्री सेल्सियस पुगेको थियो, जुन सो महिनाका लागि दोस्रो उच्च स्तरको तापक्रम हो। विज्ञहरूका अनुसार यस्तो तातो अवस्था प्रशान्त महासागर लगायत क्षेत्रको पानी अझ तातो बनाउँदै विश्वव्यापी तापक्रम वृद्धि र चरम मौसम निम्त्याउन सक्छ।
हाल चिसो चक्र क्रमशः समाप्त हुँदै सामान्य अवस्थामा फर्किने र त्यसपछि पुनः तातो चक्र सुरु हुने अनुमान गरिएको छ। यस्ता चक्रहरू प्राकृतिक भए पनि मानव गतिविधिबाट बढेको दीर्घकालीन तापक्रमसँग मिल्दा यसको प्रभाव अझ गम्भीर बन्ने वैज्ञानिकहरूको भनाइ छ।
महासागरहरूले मानवद्वारा उत्सर्जित तापको ठूलो हिस्सा सोस्ने भएकाले जलवायु सन्तुलनमा महत्वपूर्ण भूमिका खेल्छन्। तर समुद्रको तापक्रम बढ्दा शक्तिशाली आँधीबेहरी, भारी वर्षा, समुद्री सतह वृद्धि जस्ता जोखिम बढ्छन्।
प्रतिवेदनमा मार्च महिना विश्वकै चौथो सबैभन्दा तातो महिना रहेको उल्लेख गरिएको छ, जहाँ तापक्रम औद्योगिक युगअघिको स्तरभन्दा करिब १.४८ डिग्री सेल्सियस बढी रहेको छ। युरोपका धेरै भागमा उच्च तापक्रम देखिँदा अमेरिका, आर्कटिक लगायतका चिसा क्षेत्रहरूमा पनि तापक्रम असामान्य मापन गरिएको छ।
यसैबीच, आर्कटिक क्षेत्रमा समुद्री बरफको मात्रा उक्त महिनाका लागि सबैभन्दा कम रहेको पाइएको छ, जसलाई जलवायु परिवर्तनको गम्भीर संकेतका रूपमा लिइएको छ।
