काठमाडौं। अस्ट्रेलियाले वेस्ट इन्डिजविरुद्धको पाँच खेलको टी-२० अन्तर्राष्ट्रिय शृंखलामा क्लिन स्वीप गर्दै ऐतिहासिक सफलता हात पारेको छ। अन्तिम खेलमा ३ विकेटको रोमाञ्चक जितसँगै अस्ट्रेलियाले शृंखला ५-० ले आफ्नो पक्षमा पारेको हो। बेन ड्वारशुइसको धारिलो बलिङ र मध्यक्रमका ब्याट्सम्यानहरूको विस्फोटक प्रदर्शनले १७१ रनको लक्ष्य १७ ओभरमै पूरा गर्न अस्ट्रेलियालाई मद्दत पुग्यो।
वेस्ट इन्डिजको ब्याटिङ र अस्ट्रेलियाको बलिङ
टस जितेर पहिले ब्याटिङ गरेको वेस्ट इन्डिजले १९.४ ओभरमा सबै विकेट गुमाउँदै १७० रन को चुनौतीपूर्ण योगफल तयार पारेको थियो। वेस्ट इन्डिजका लागि कुनै पनि ब्याट्सम्यानले ठूलो स्कोर बनाउन सकेनन्।
अस्ट्रेलियाका लागि बलरहरूले उत्कृष्ट प्रदर्शन गरे। बेन ड्वारशुइस ले ३ विकेट लिएर वेस्ट इन्डिजको ब्याटिङ लाइनअपलाई धरमराए। नाथन एलिसले २ विकेट लिँदा एडम जाम्पा, शन एबट, आरोन हार्डी र ग्लेन म्याक्सवेलले समान १-१ विकेट हात पारे।
अस्ट्रेलियाको आक्रामक चेज
१७१ रनको लक्ष्य पछ्याएको अस्ट्रेलियाको सुरुवात राम्रो नभए पनि मध्यक्रमका ब्याट्सम्यानहरूले उत्कृष्ट खेलेका थिए। मिचेल ओवेन ले १७ बलमा ३७ रन, क्यामरन ग्रीन ले १८ बलमा ३२ रन र टिम डेभिड ले १२ बलमा ३० रन बनाउँदै जितको आधार तयार पारे। अस्ट्रेलियाले ७ विकेट गुमाए पनि लक्ष्य ३ ओभर बाँकी रहँदै भेट्टायो।
यसअघिका चार खेलमा पनि अस्ट्रेलियाले क्रमश: ३, ८, ६ र ३ विकेटको जित हासिल गर्दै आफ्नो दबदबा कायम राखेको थियो। यो क्लिन स्वीप अस्ट्रेलियाली क्रिकेट इतिहासमा एउटा महत्त्वपूर्ण उपलब्धि बनेको छ।