आज प्रतिनिधि सभाको बैठक बस्दै, यस्ता छन् मुख्य कार्यसूची

काठमाडौँ । सङ्घीय संसद अन्तर्गत प्रतिनिधि सभाको बैठक दिउँसो १ बजे नयाँ बानेश्वरस्थित संसद भवनमा बस्ने संसद सचिवालयले जनाएको छ । आजको बैठकमा सरकारका विभिन्न मन्त्रालयसँग सम्बन्धित मौखिक प्रश्नोत्तरको कार्यक्रम रहेको छ ।
सभामा सांसदले सोधेका ​प्रश्नहरुको जवाफ दिने कार्यक्रम छ । ​सञ्चार तथा सूचना प्रविधि मन्त्रालय, ​परराष्ट्र मन्त्रालय, उद्योग, वाणिज्य तथा आपूर्ति मन्त्रालय, ​स्वास्थ्य तथा जनसङ्ख्या मन्त्रालय, ऊर्जा, जलस्रोत तथा सिँचाइ मन्त्रालयसित सम्बन्धित सांसदहरूले सोधेका प्रश्नहरूको सम्बन्धित मन्त्रालय सम्हालेका मन्त्रीहरूले जवाफ दिने कार्यसूची रहेको छ ।
​यसका साथै, सञ्चार तथा सूचना प्रविधिमन्त्री पृथ्वीसुब्बा गुरुङले ‘सूचना प्रविधि तथा साइबर सुरक्षा विधेयक, २०८२’ माथि छलफलका लागि प्रस्ताव पेस गर्ने कार्यसूची रहेको छ ।
साथै ​विभिन्न संसदीय समितिका बैठक पनिबस्ने कार्यतालिका छ ।
​प्रतिनिधि सभाको बैठकबाहेक आज चारवटा संसदीय समितिका बैठक पनि बस्दैछन् । यी बैठकहरुमा विभिन्न महत्वपूर्ण विषयमा छलफल हुनेछ ।
बुधबारको ​अर्थ समितिको बैठकमा ‘वैकल्पिक विकास वित्त परिचालन सम्बन्धमा व्यवस्था गर्न बनेको विधेयक’ माथि दफावार छलफल हुनेछ ।
​कानुन, न्याय तथा मानव अधिकार समितिको बैठकमा गृहमन्त्रीसँग यही साउन २३ गते कैलाली कारागारमा भएको घटना र त्यसको समाधानका उपायबारे छलफल हुनेछ ।
​कृषि, सहकारी तथा प्राकृतिक स्रोत समितिको बैठकमा ‘भूमिसम्बन्धी केही नेपाल ऐनलाई संशोधन गर्न बनेको विधेयक, २०८२’ माथि छलफल गर्ने कार्यक्रम छ ।
​सङ्घीयता सबलीकरण तथा राष्ट्रिय सरोकार समितिको पनि बैठक बस्दैछ । यस समितिले महालेखापरीक्षकको ६२औँ प्रतिवेदनका मुख्य पक्षहरुमाथि छलफल गर्ने कार्यसूची छ ।