काठमाडौँ । चितवन जिल्लामा बर्ड फ्लु (एभियन इन्फ्लुएन्जा) संक्रमण पुष्टि भएपछि १८ हजारभन्दा बढी कुखुरा नष्ट गरिएको छ।
पशु सेवा विभागका अनुसार संक्रमण फैलिन नदिन प्रभावित क्षेत्रका कुखुरा, चल्ला, अण्डा तथा दानासमेत सुरक्षित रूपमा नष्ट गरिएको हो।
भरतपुर महानगरपालिका क्षेत्रस्थित एक कुखुरा फार्ममा गरिएको परीक्षणका क्रममा संक्रमण पुष्टि भएपछि तत्काल नियन्त्रणका उपायहरू अघि बढाइएको जनाइएको छ।
प्राविधिक टोलीले फार्मलाई केन्द्रमा राखेर आसपासका क्षेत्रमा निगरानी बढाएको छ भने जोखिम न्यूनीकरणका लागि ‘किलिङ, डिस्पोजल र डिसइन्फेक्सन’ प्रक्रिया अपनाइएको छ।
संक्रमण देखिएसँगै फार्म वरपरको निश्चित दूरीभित्रका सबै कुखुरा नष्ट गरिएको हो। साथै प्रभावित क्षेत्रलाई नियन्त्रणमा राख्दै कुखुरा तथा कुखुराजन्य उत्पादनको ओसारपसारमा अस्थायी प्रतिबन्ध लगाइएको छ।
अधिकारीहरूका अनुसार बर्ड फ्लु अत्यन्त संक्रामक रोग भएकाले समयमै नियन्त्रण नगरे ठूलो क्षति हुन सक्ने खतरा रहन्छ। त्यसैले उच्च सतर्कता अपनाइएको जनाइएको छ।
जिल्ला प्रशासन कार्यालयले किसान तथा व्यवसायीलाई सतर्क रहन आग्रह गर्दै कुखुरामा असामान्य व्यवहार, अचानक मृत्यु वा अन्य लक्षण देखिएमा नजिकको पशु सेवा कार्यालयमा तुरुन्त जानकारी गराउन अनुरोध गरेको छ।
सरकारले प्रभावित किसानलाई प्रचलित मापदण्डअनुसार क्षतिपूर्ति उपलब्ध गराउने प्रक्रिया अघि बढाउने जनाएको छ। साथै रोग नियन्त्रणका लागि आवश्यक औषधि, जनशक्ति र प्राविधिक सहयोग परिचालन गरिएको छ।