काठमाडौँ । लक्ष्मी सनराइज क्यापिटल लिमिटेडद्वारा व्यवस्थापन गरिएको ‘एलएस होराइजन १२’ योजनामा लगानीकर्ताको उल्लेखनीय आकर्षण देखिएको छ । मागभन्दा अत्यधिक आवेदन परेपछि योजनाको इकाई बिक्री आवेदन निर्धारित समयअघि नै बन्द गरिएको कम्पनीले जनाएको छ ।
लक्ष्मी सनराइज बैंक लिमिटेड कोष प्रवर्द्धक तथा लक्ष्मी सनराइज क्यापिटल लिमिटेड योजना व्यवस्थापक रहेको यस बन्दमुखी सामूहिक लगानी योजनाको १२ करोड इकाई बिक्रीका लागि वैशाख ३० गतेदेखि सार्वजनिक निष्काशन खुला गरिएको थियो ।
तर, निष्काशन खुलेको छ कार्यदिनभित्रै एक अर्ब ५० करोड रुपैयाँभन्दा बढी बराबरको आवेदन प्राप्त भएपछि बिहिबारदेखि आवेदन प्रक्रिया बन्द गरिएको कम्पनीले जानकारी दिएको छ ।
योजनाको कुल निष्काशनमध्ये बीज पूँजीबापत एक करोड ८० लाख इकाई लक्ष्मी सनराइज बैंक लिमिटेडलाई सुरक्षित गरिएको थियो भने बाँकी १० करोड २० लाख इकाई सर्वसाधारण लगानीकर्ताका लागि निष्काशन गरिएको थियो ।
लगानीकर्ताले न्यूनतम १०० कित्तादेखि अधिकतम एक करोड २० लाख इकाइसम्म आवेदन दिन सक्ने व्यवस्था गरिएको थियो । आवेदन नेपाल धितोपत्र बोर्डबाट स्वीकृति प्राप्त बैंक तथा वित्तीय संस्थाका आस्वा सेवा केन्द्रमार्फत संकलन गरिएको कम्पनीले जनाएको छ ।
कम्पनीका अनुसार छोटो अवधिमै योजनाप्रति देखिएको उत्साहजनक सहभागिताले नेपाली पुँजी बजारप्रति लगानीकर्ताको विश्वास अझ मजबुत बन्दै गएको संकेत गरेको छ ।
उक्त योजनाको धितोपत्र निष्काशन तथा बिक्री प्रबन्धकको जिम्मेवारी पनि लक्ष्मी सनराइज क्यापिटल लिमिटेडले नै निर्वाह गरेको हो ।