काठमाण्डौ । फिफा विश्वकप–२०२६ अन्तर्गत पाराग्वेमाथि कठिन जित निकाल्दै फ्रान्स क्वार्टरफाइनल अर्थात् अन्तिम आठमा पुगेको छ।
अमेरिकाको फिलाडेल्फिया स्टेडियममा सम्पन्न प्रि–क्वार्टरफाइनल खेलमा फ्रान्सका कप्तान किलियन एम्बाप्पेको एकमात्र गोल निर्णायक बन्यो। उनले खेलको ७०औँ मिनेटमा पेनाल्टीमार्फत गोल गर्दै टोलीलाई १–० को जित दिलाए।
पाराग्वेका डिएगो गोमेजले फ्रान्सका डेसियर डोएलाई फउल गरेपछि भिडियो सहायक रेफ्री (भिएआर) को समीक्षा पश्चात् फ्रान्सले पेनाल्टी पाएको थियो, जसलाई एम्बाप्पेले सफलतापूर्वक गोलमा परिणत गरेका हुन्।
खेलको अन्त्यतिर एम्बाप्पेसँग थप दुई गोल गर्ने अवसर आए पनि पाराग्वेका गोलरक्षक ओरलान्डो गिलले उत्कृष्ट बचाउ गर्दै फ्रान्सलाई अग्रता फराकिलो बनाउन दिएनन्।
योसँगै फ्रान्स लगातार चौथोपटक विश्वकपको क्वार्टरफाइनलमा पुग्न सफल भएको छ। सन् २०२२ को विश्वकपमा पनि फ्रान्सले मोरक्कोलाई हराउँदै फाइनल यात्रा तय गरेको थियो।
जारी विश्वकपमा एम्बाप्पेको यो सातौँ गोल हो। सर्वाधिक गोलकर्ताको सूचीमा उनी अर्जेन्टिनाका कप्तान लियोनल मेसीसँग संयुक्त रूपमा शीर्ष स्थानमा छन्। दुवैले हालसम्म सात–सात गोल गरेका छन्।
अब सेमिफाइनल प्रवेशका लागि फ्रान्सले मोरक्कोसँग प्रतिस्पर्धा गर्नेछ। मोरक्कोले पनि राउन्ड अफ १६ मा क्यानडालाई पराजित गर्दै अन्तिम आठमा आफ्नो स्थान सुरक्षित गरेको छ।