नबिल बैंक लिमिटेडले चालु आर्थिक वर्ष २०८१/८२ को तेस्रो त्रैमाससम्मको अपरिष्कृत वित्तीय विवरण प्रकाशित गरेको छ। विवरणअनुसार बैंकले वाणिज्य बैंकहरूमध्ये सर्वाधिक खुद नाफा कमाएर अग्रणी स्थान कायम गरेको छ।
बैंकले चालु आर्थिक वर्षको पहिलो नौ महिनामा ५ अर्ब ५ करोड १४ लाख रुपैयाँ खुद नाफा कमाएको छ, जुन गत आर्थिक वर्षको सोही अवधिको तुलनामा ८.२१ प्रतिशतले बढी हो। गत वर्षको यही अवधिमा बैंकले ४ अर्ब ६६ करोड ८० लाख रुपैयाँ खुद नाफा कमाएको थियो। इम्पेयरमेन्ट चार्जमा आएको कमीले नाफा वृद्धिमा मुख्य योगदान गरेको छ, यद्यपि खुद ब्याज आम्दानीमा भने कमी आएको छ।
आम्दानी र खर्चको अवस्था
समीक्षा अवधिमा बैंकको खुद ब्याज आम्दानी ३.९६ प्रतिशतले घटेको छ भने खुद फि तथा कमिशन आम्दानी २.२७ प्रतिशतले बढेको छ। यस्तै, कुल सञ्चालन आम्दानी ०.२० प्रतिशतले घटे पनि सञ्चालन मुनाफा १४.०३ प्रतिशतले वृद्धि भएको छ। इम्पेयरमेन्ट चार्ज गत वर्षको ३ अर्ब २३ करोडबाट घटेर २ अर्ब २९ करोडमा सीमित हुँदा नाफामा सकारात्मक प्रभाव परेको छ।
प्रतिशेयर आम्दानी र अन्य सूचकहरू
नबिल बैंकको प्रतिशेयर आम्दानी (ईपीएस) १ रुपैयाँ ६५ पैसाले बढेर २४ रुपैयाँ ८९ पैसा पुगेको छ। चैत मसान्तसम्म बैंकको वितरणयोग्य आम्दानी २ अर्ब ८७ करोड रुपैयाँ छ भने वितरणयोग्य प्रतिशेयर आम्दानी १२ रुपैयाँ ६८ पैसा रहेको छ। यस्तै, बैंकको मूल्य आम्दानी अनुपात (पी/ई रेसियो) १९.५६ गुणा र प्रतिशेयर नेटवर्थ २२६ रुपैयाँ ३६ पैसा रहेको छ।
निक्षेप, कर्जा र पूँजीको अवस्था
२७ अर्ब ५ करोड ६९ लाख रुपैयाँ चुक्ता पूँजी रहेको नबिल बैंकको जगेडा कोषमा ३४ अर्ब १८ करोड ९६ लाख रुपैयाँ सञ्चित छ। बैंकले तेस्रो त्रैमासको अन्त्यसम्म ५ खर्ब २ अर्ब १० करोड ६१ लाख रुपैयाँ निक्षेप संकलन गरेको छ भने ४ खर्ब १ अर्ब १६ करोड २३ लाख रुपैयाँ कर्जा प्रवाह गरेको छ।
नबिल बैंकको यो वित्तीय प्रगतिले मुलुकको बैंकिङ क्षेत्रमा आफ्नो बलियो उपस्थिति र स्थिरताको संकेत गरेको छ