नेपालमा सुन र चाँदीको भाउ यस साता उल्लेख्य रूपमा वृद्धि भएको छ। अन्तर्राष्ट्रिय बजारमा देखिएको सामान्य वृद्धिको प्रभाव नेपाली बजारमा पनि परेको व्यवसायीहरूले बताएका छन्। सुनको भाउ साताको पहिलो दिन आइतबार प्रतितोला एक लाख ५० हजार २०० रुपैयाँ रहेकोमा अन्तिम दिन शुक्रबारसम्ममा एक लाख ५३ हजार ५०० रुपैयाँ पुगेको छ। यस अवधिमा सुन तोलामा तीन हजार तीन सय रुपैयाँले महँगिएको हो।
सुनको भाउमा यस साता लगातार उतारचढाव देखियो। आइतबार एक लाख ५० हजार २०० रुपैयाँमा कारोबार भएको सुन सोमबार एक लाख ५० हजार ६०० रुपैयाँमा पुग्यो। मंगलबार भने सुनको भाउ घटेर एक लाख ४९ हजार ६०० रुपैयाँमा झरेको थियो। बुधबार पुनः वृद्धि भएर एक लाख ५१ हजार रुपैयाँमा पुगेको सुन बिहीबार एक लाख ५१ हजार ५०० रुपैयाँमा कारोबार भयो। साताको अन्तिम दिन, शुक्रबार सुनको भाउ एक लाख ५३ हजार ५०० रुपैयाँमा पुगेको छ।
चाँदीको भाउमा पनि वृद्धिको क्रम जारी रह्यो। साताको सुरुवातमा प्रतितोला एक हजार ७९० रुपैयाँ रहेको चाँदीको मूल्य अन्तिम दिन शुक्रबारसम्ममा एक हजार ८१० रुपैयाँ पुगेको छ। सोमबार चाँदीको भाउमा वृद्धि भए पनि मंगलबारमा गिरावट देखियो। बुधबार भने स्थिर रहेको चाँदीको मूल्य बिहीबार पुनः वृद्धि भएर एक हजार ७९० रुपैयाँमा पुगेको थियो। अन्तिम दिन, शुक्रबार चाँदी प्रतितोला एक हजार ८१० रुपैयाँमा कारोबार भयो।
अन्तर्राष्ट्रिय बजारमा सुनको भाउ यस साताको अवधिमा प्रतिआउन्स २९ डलरले वृद्धि भएर साताको उच्च बिन्दु २६६४ डलरमा पुगेको छ। हाल सुन प्रतिआउन्स २६५५ डलरमा कारोबार भइरहेको छ। विश्व बजारमा सुनको भाउमा भएको वृद्धिको कारण अमेरिकी आर्थिक नीतिहरूमा अपेक्षित परिवर्तन, केन्द्रीय बैंकको रेकर्ड खरिद, र विभिन्न भू-राजनीतिक तनाव रहेका छन्।
भाउमा वृद्धि भए पनि नेपाली बजारमा सुनको आपूर्ति सहज हुन सकेको छैन। व्यवसायीहरूले महासंघले तोकेको मूल्यभन्दा बढी तिरेर सुन खरिद गर्नुपरेको गुनासो गरेका छन्। यस साता सुनको भाउ पछिल्ला दुई सातायताकै उच्च बिन्दुमा पुगेको छ।