काठमाण्डौं। नेपाल बैंक लिमिटेड सञ्चालक समितिका पूर्वअध्यक्ष डा चन्द्रबहादुर अधिकारीविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले अधिकारीविरुद्ध विशेष अदालतमा सोमबार भ्रष्टाचार मुद्दा दायर गरेको हो।
रूपन्देहीको सिद्धार्थनगर–१ बेलहियास्थित भुसाल हस्पिटालिटीअन्तर्गतको र्याडिसन प्रोजेक्टको बैंकबाट हुने ऋण प्रक्रियामा सहजीकरण गरिदिने भन्दै १९ लाख रुपैयाँ घुस लिएको उनीविरुद्ध उजुरी परेको थियो। त्यसपछि अनुसन्धान पूरा गरेर अधिकारीविरुद्ध अख्तियारले मुद्दा दायर गरेको हो।
घुसबापतको १९ लाख रुपैयाँ भारतीय नागरिक लक्की भन्ने खुस नसिब अन्सारीमार्फत् अधिकारीले लिएको देखिएको अख्तियारले अभियोगपत्रमा उल्लेख गरेको छ।
अधिकारीले भुसाल हस्पिटालिटीलाई बैंकबाट एक अर्ब ७७ करोड २९ लाख कर्जा प्रवाह गराइदिएवापत १९ लाख घुस लिएको पुष्टि भएको अख्तियारले जनाएको छ।
उनीसँगै अख्तियारले भुसाल हस्पिटालिटीका सञ्चालक बालकृष्ण भुसाल, अंकित भुसाल र अमृत भुसालविरुद्ध पनि घुस दिएको आरोपमा मुद्दा दायर छ ।