काठमाडौं । पुष्पकमल दाहाल‘प्रचण्ड’ले नेपालको कम्युनिस्ट आन्दोलनले ऐतिहासिक उपलब्धि हासिल गरे पनि क्रान्तिको अन्तिम लक्ष्य अझै पूरा नभएको बताएका छन्।
Nirmal Lama Memorial Foundation को आयोजनामा सम्पन्न स्मृति कार्यक्रममा बोल्दै नेकपाका संयोजकसमेत रहेका प्रचण्डले समाजवाद स्थापनाको लक्ष्यलाई मूर्तरूप दिन कम्युनिस्ट शक्तिहरूबीच अझ व्यापक एकता आवश्यक रहेको बताए। कार्यक्रममा नेकपा मसालका महामन्त्री विशेष अतिथिका रूपमा सहभागी भएका थिए।
प्रचण्डले विगतका संघर्ष, जनआन्दोलन, शान्ति प्रक्रिया र संविधानसभामार्फत नेपाली जनताले ठूलो राजनीतिक उपलब्धि हासिल गरेको उल्लेख गर्दै ती उपलब्धिलाई संस्थागत गर्न सबै प्रगतिशील शक्तिबीच सहकार्य अपरिहार्य रहेको धारणा राखे।
उनले समाजवादको आधार निर्माण गर्न विभिन्न कम्युनिस्ट समूहलाई एकताबद्ध गर्दै नेकपा गठन गरिएको स्मरण गराउँदै बाँकी रहेका कम्युनिस्ट शक्तिहरूलाई पनि छिट्टै एउटै मोर्चामा ल्याइने दाबी गरे।
संयोजक दाहालले भने, ‘अहिले सरकारको तर्फबाट सबभन्दा गरिबहरुमाथि, निमुखाहरुमाथि नै सबभन्दा बढी आहात, पीडा दिने कोशिस भएको छ । सबभन्दा गरिब, जसको हामी वर्गं आधार भन्ने गर्दछौँ । त्यही वर्गंमाथि प्रहार भएको छ । हामीले यो बीचमा वैचारिक ढंगले र आफनो वर्गं आधारलाई दह्रोसँग समात्नुपर्नेमा कमजोरी भएको छ । हाम्रो वर्गीय पक्षधरतामाथि आक्रमण गरेर नेपालमा कम्युनिष्टहरुलाई सिध्याउने देशीविदेशी प्रतिक्रियावादीहरु लागेका छन्। त्यसकारण हामीले वर्ग संघर्षलाई माथि उठाउन सबै कम्युनिष्टहरुबीच एकता गरेर अघि बढ्नुपर्नेछ ।’
“क्रान्ति केवल सत्ता परिवर्तन होइन, जनताको जीवनमा वास्तविक परिवर्तन ल्याउने प्रक्रिया हो,” प्रचण्डको भनाइ उद्धृत गर्दै कार्यक्रममा सहभागी नेताहरूले बताएका छन्।
उनले शान्ति सम्झौता, संघीय लोकतान्त्रिक गणतन्त्र र संविधानसभाबाट प्राप्त उपलब्धिमाथि विभिन्न कोणबाट प्रहार भइरहेको उल्लेख गर्दै त्यसको रक्षाका लागि सबै परिवर्तनकारी राजनीतिक शक्तिहरू एकजुट हुनुपर्ने बताए।
प्रचण्डले आगामी दिनमा लोकतन्त्र, सामाजिक न्याय र समाजवादको यात्रालाई अझ सशक्त बनाउँदै अघि बढ्ने प्रतिबद्धता समेत व्यक्त गरेका छन्।