नन्दलाल खरेल
काठमाडौंको महानगर प्रमुख बालेन्द्र शाह, जसलाई जनताले “बालेन” भनेर चिन्छन्, फेरि पनि राष्ट्रिय राजनीतिको केन्द्रमा चर्चामा छन्। जेनजी आन्दोलनले उत्पन्न गरेको राजनीतिक भूकम्पपछि उनको नाम प्रधानमन्त्रीका लागि समेत उठ्यो, तर उनले त्यो जिम्मेवारी लिने आँट गरेनन्। उनले सामाजिक सञ्जालमार्फत मात्र आफ्नो धारणा राखे र नेतृत्व सुशीला कार्कीलाई सुम्पनुपर्ने समर्थन जनाए। यसले बालेनको स्वभाव र शैलीलाई स्पष्ट पार्छ—सडकमा नारा लगाउने भन्दा पनि आफ्ना विचार डिजिटल संसारबाट जनतालाई सुनाउने।
तर, प्रश्न उठ्छ—के बालेन अब पार्टी खोल्ने तयारीमा छन् ?
राजधानीका सडकहरूमा पसिनासहित खटिरहेका मजदुरदेखि लिएर कफी पसलमा बहस गर्ने युवासम्म यो प्रश्न चर्चामा छ। बालेनका कानुनी सल्लाहकार ओमप्रकाश अर्याल गृहमन्त्री बनेका छन्, ऊर्जा क्षेत्रमा लोकप्रिय कुलमान घिसिङ पनि मन्त्रिपरिषद्मा पुगेका छन्। यी सबै नामलाई बालेनकै प्रभावको उपजका रूपमा लिइन्छ। अनि जब राष्ट्रिय स्वतन्त्र पार्टीकी नेतृ सुमना श्रेष्ठले आफ्नो पुरानो पार्टी छाडिन्, धेरैको आँखा फेरि बालेनतिरै फर्कियो।
तर बालेन भने मौन छन्। उनको सचिवालय भन्छ—“मेयर पदमा बसेको मान्छेले आन्दोलनतिर प्रत्यक्ष कुद्ने कुरा भएन। महानगरमै अपार जिम्मेवारी छ, त्यसैले अहिले हतार नगर्ने पक्षमा छौं।” वास्तवमा काठमाडौं महानगर आफैं एउटा सानो देशजस्तै हो, सडक, ढल, फोहोरदेखि लिएर शिक्षा, स्वास्थ्यसम्म हरेक चासो बालेनको काखमै आउँछ। उनले यही कामलाई पहिलो प्राथमिकतामा राखेका छन्।
तर, समयले उनलाई रोकिराख्ला त ?
मञ्चमा नउत्रिए पनि जनतालाई नेतृत्वमा देख्न चाहने ठूलो अपेक्षा बालेनमाथि छ। जेनजी आन्दोलनले मागेको प्रत्यक्ष निर्वाचित प्रधानमन्त्रीको अवधारणा पनि उनको विचारसँग मिल्दोजुल्दो छ। यसैबीच सरकारले फागुन २१ गते मध्यावधि निर्वाचन घोषणा गरिसकेको छ। ठूला पार्टीहरू मैदानमा उत्रिरहेका बेला बालेनले नयाँ पार्टी घोषणा गरे भने त्यो चुनावी मैदानको समीकरण नै बदलिन सक्छ।
बालेन राजनीतिको खेलमा हतार गर्ने स्वभावका देखिँदैनन्। क्वाटरमा पुगेपछि उनी भेटघाट गर्न नमान्ने, सीमित सर्कलमा मात्र छलफल गर्ने उनको बानी छ। तर, यही मौनता कतिपयलाई अझै रोचक लाग्छ—के उनी रणनीति बनाएर बसिरहेका छन् ? के सही समयमा मात्रै राजनीतिक पासो हान्ने सोचमा छन् ?
जनताले भने चुपचाप प्रतीक्षा गरिरहेका छन्। सहरका गल्लीहरूमा उठ्ने प्रश्न एउटै छ—“बालेन पार्टी खोल्छन् ? खोले भने कस्तो टिम हुन्छ ?”