युक्रेन युद्ध रोक्न नयाँ प्रस्ताव : अमेरिकी नेतृत्वमा बनेको २० बुँदे योजना जेलेंस्कीद्वारा सार्वजनिक

काठमाडौं —युक्रेनी राष्ट्रपति भोलोदिमिर जेलेंस्कीले रूससँग जारी युद्ध अन्त्य गरी दीर्घकालीन शान्ति स्थापना गर्ने उद्देश्यसहित अमेरिकाको नेतृत्वमा तयार गरिएको २० बुँदे नयाँ योजना सार्वजनिक गरेका छन् । जेलेंस्कीका अनुसार उक्त योजनामा किएभ र वाशिङ्टनबीच सहमति भइसकेको छ भने मस्कोको प्रतिक्रियाका लागि प्रस्ताव पठाइसकिएको छ ।
प्रस्तावित योजनामा युक्रेनको सार्वभौमिकता पुनः पुष्टि गर्ने, युक्रेन–रूसबीच पूर्ण गैर–आक्रमण सम्झौता गर्ने तथा युक्रेनलाई अन्तर्राष्ट्रिय सुरक्षा प्रत्याभूति प्रदान गर्ने व्यवस्था समेटिएको छ । योजनाअनुसार युक्रेनी सेनाको क्षमता यथावत् रहनेछ भने नाटो, अमेरिका र युरोपेली साझेदारहरूले आवश्यक सुरक्षा सहयोग प्रदान गर्नेछन् ।
योजनामा युक्रेनलाई युरोपेली सङ्घको सदस्यता दिलाउने मार्गचित्र, युद्धपछिको अर्थतन्त्र र पूर्वाधार पुनर्निर्माणका लागि विकास प्याकेज लागू गर्ने, डनिप्रो नदी र कालो सागरमार्फत व्यापारिक पहुँच सुनिश्चित गर्ने प्रावधान पनि समावेश गरिएको छ ।
त्यसैगरी जापोरिज्जिया परमाणु ऊर्जा स्टेशनलाई युक्रेन, अमेरिका र रूसको संयुक्त व्यवस्थापनमा सञ्चालन गर्ने प्रस्ताव गरिएको छ । मानवीय संकट समाधानका लागि छुट्टै मानवीय समिति गठन गर्ने, युद्धबन्दी तथा अन्य कैदीहरूको आदान–प्रदान सुनिश्चित गर्ने र युक्रेनमा छिट्टै निर्वाचन सम्पन्न गर्ने व्यवस्था पनि योजनामा उल्लेख छ ।
सम्झौताको कानुनी कार्यान्वयन शान्ति परिषद्को निगरानीमा हुने र सबै पक्ष सहमत भएपछि तत्काल पूर्ण युद्धविराम लागू गरिने प्रस्ताव गरिएको छ । राष्ट्रपति जेलेंस्कीले यो योजनाले युक्रेन–रूस द्वन्द्वको अन्त्यतर्फ निर्णायक मोड ल्याउने विश्वास व्यक्त गरेका छन् ।