चार प्रदेशमा मेघगर्जनसहित वर्षाको सम्भावना, केही स्थानमा भारी वर्षाको चेतावनी

काठमाडौँ । देशका विभिन्न भूभागमा मौसम बदली भई मेघगर्जन, चट्याङ्गसहित वर्षा हुने सम्भावना देखिएको छ। जल तथा मौसम विज्ञान विभागअन्तर्गत मौसम पूर्वानुमान महाशाखाले मङ्गलबारका लागि जारी गरेको पूर्वानुमानअनुसार कोशी, मधेस, बागमती र गण्डकी प्रदेशका केही स्थानमा वर्षा हुने सम्भावना रहेको जनाएको छ।
महाशाखाका मौसमविद् सरोज पुडासैनीका अनुसार मंगलबार दिउँसो लुम्बिनी, कर्णाली र सुदूरपश्चिम प्रदेशका हिमाली भूभागका थोरै स्थानमा मध्यम खालको वर्षा वा हिमपात हुन सक्ने अनुमान गरिएको छ। उच्च हिमाली क्षेत्रमा मौसम थप सक्रिय हुने संकेत देखिएकाले आवश्यक सतर्कता अपनाउन आग्रह गरिएको छ।
त्यस्तै, कोशी प्रदेशका हिमाली तथा पहाडी क्षेत्र र गण्डकी प्रदेशका पहाडी भूभागका एक–दुई स्थानमा मेघगर्जन र चट्याङ्गसहित भारी वर्षा हुन सक्ने सम्भावना रहेको मौसमविद्हरूले बताएका छन्। छोटो अवधिमै धेरै पानी पर्न सक्ने भएकाले ती क्षेत्रका बासिन्दालाई विशेष सावधानी अपनाउन सुझाव दिइएको छ।
महाशाखाका अनुसार बुधबार पनि मौसमको यही प्रणाली कायम रहने देखिएको छ। कोशी, मधेस, बागमती र गण्डकी प्रदेशका धेरै स्थानमा मेघगर्जन, चट्याङ्गसहित मध्यम वर्षा, साथै उच्च भूभागमा हिमपात वा पानी पर्ने सम्भावना रहेको पूर्वानुमान छ।
यसबाहेक कोशी र मधेस प्रदेशका एक–दुई स्थान, साथै बागमती र गण्डकी प्रदेशका पहाडी क्षेत्रका केही स्थानमा भारी वर्षा हुन सक्ने भएकाले नदी–नाला आसपासका बस्ती, पहिरोको जोखिमयुक्त क्षेत्र तथा शहरी डुबान हुन सक्ने स्थानमा सतर्कता अपनाउन विभागले आग्रह गरेको छ।
मौसमविद्हरूका अनुसार पछिल्ला दिनमा विकसित भएको स्थानीय वायुसँगै पश्चिमी वायु प्रणालीको प्रभावका कारण देशका विभिन्न भागमा मौसम अस्थिर बनेको हो। यसले आगामी केही दिनसम्म आकाश बदली, चट्याङ्ग र वर्षाको क्रम कायम रहने संकेत देखिएको विभागले बताएको छ।