काठमाण्डौ । उत्तर कोरियाले अमेरिकी योजना ‘गोल्डेन डोम’को चर्को आलोचना गरेको छ। ‘गोल्डेन डोम’को आलोचना गर्दै यसले अन्तरिक्षलाई सम्भावित आणविक युद्धक्षेत्रमा परिणत गर्न सक्ने बताउँदै यस्तो कार्यको पछि नलाग्न चेतावनी दिएको छ।
अमेरिकी राष्ट्रपति डोनाल्ड ट्रम्पले हालै आफ्नो कार्यकालको अन्त्यसम्ममा प्रतिरक्षा प्रणाली ‘गोल्डेन डोम’ सुरु गर्ने घोषणा गरेका हुन्।
गोल्डेन डोमको उद्देश्य अमेरिकालाई भविष्यमा हुने ब्यालिस्टिक र क्रुज मिसाइलजस्ता क्षेप्यास्त्र आक्रमणबाट बचाउनु भएको अमेरिकी अधिकारीहरूको दावी छ।
उत्तर कोरियाको सरकारी सञ्चारमाध्यमका अनुसार उत्तर कोरियाली विदेश मन्त्रालयले ट्रम्पको योजनालाई ‘अहंकारको पराकाष्ठा’ भनेको छ।
साथै उत्तर कोरियाले अमेरिकाले अन्तरिक्षलाई युद्धभूमिमा परिणत गर्न खोजेको आरोप लगाउँदै यस्तो कार्यले विश्वमा आणविक र अन्तरिक्ष हतियारको दौड निम्त्याउन सक्ने चेतावनी पनि दिएको छ।
कोरिया इन्स्टिच्युट फर नेसनल युनिफिकेसनका वरिष्ठ विश्लेषक होङ मिनले एएफपीसँग भनेका छन्, ‘उत्तर कोरिया गोल्डेन डोमले आफ्नो आणविक हतियार कमजोर बनाउन सक्ने ठान्छ।’
उत्तर कोरियाले यसअघि देखि नै अमेरिकालाई आफ्नो शत्रु मान्छ भने अमेरिकाले दक्षिण कोरियाका सैन्य गतिविधिको विरोध गरिरहेको छ।