मुस्ताङ । कात्तिक सुरु भएको १० दिनमै मुस्ताङमा ४० हजारभन्दा बढी पर्यटक पुगेका छन्। जिल्ला प्रहरी कार्यालय मुस्ताङका अनुसार कात्तिक १ देखि १० गतेसम्म राष्ट्रिय गौरवको बेनी–जोमसोम सडकमार्ग हुँदै ३७ हजार १४६ आन्तरिक र तीन हजार ७३२ विदेशी पर्यटक मुस्ताङ भित्रिएका हुन्।
त्यही अवधिमा ११ हजार ८०८ वटा सवारीसाधन — बस, जीप, कार, भ्यान र मोटरसाइकल — उक्त सडकमार्ग हुँदै मुस्ताङ पुगेका थिए, प्रहरी नायब उपरीक्षक छिरिङ किप्पा लामाले जानकारी दिए।
तर, सोमबार रातिदेखि परेको वर्षा र हिमपातले मुस्ताङका पर्यटक समस्यामा परेका छन्। विशेषगरी मुक्तिनाथ क्षेत्रमा बाक्लो हिमपात भएपछि कागबेनी–मुक्तिनाथ सडकखण्ड र मन्दिर जाने पैदलमार्ग अवरुद्ध भएका छन्।
मुक्तिनाथ मन्दिर विकास समितिका कर्मचारी रविन सुवेदीका अनुसार हिमपातका कारण क्षेत्र अत्यधिक चिसो भएको छ र मुक्तिनाथका स्नानकुण्ड र १०८ धारा जमेर भक्तजनका धार्मिक क्रियाकलापमा अवरोध पुगेको छ।
प्रहरीका अनुसार कात्तिक १० गते मात्रै म्याग्दी हुँदै ४ हजार ५९८ जना पर्यटक मुस्ताङ प्रवेश गरेका थिए। यद्यपि, तीमध्ये कतिपयको मुक्तिनाथ दर्शन यात्रा हिमपातका कारण असहज भएको छ।
योसँगै चालु आर्थिक वर्षको साउनदेखि कात्तिक १० गतेसम्म बेनी–जोमसोम सडकमार्ग हुँदै मुस्ताङ प्रवेश गर्ने पर्यटकको संख्या १ लाख ५९ हजार ४६७ पुगेको छ।