काठमाण्डौ । स्याङ्जाको बिरुवा गाउँपालिका–४ मडकिनास्थित घुम्ती–बिरुवा भित्री सडक खण्डमा जिप दुर्घटना हुँदा ११ जना घाइते भएका छन्।
सोमबार साँझ पुतलीबजारबाट बिरुवातर्फ जाँदै गरेको ग १ ज ७०८४ नम्बरको जिप अनियन्त्रित भई करिब १५ मिटर तल खसेर दुर्घटना भएको जिल्ला प्रहरी कार्यालय स्याङ्जाले जनाएको छ। प्रहरी नायब उपरीक्षक प्रशन्न राज चौधरीका अनुसार जिपमा चालकसहित १५ जना सवार थिए।
दुर्घटनामा घाइते भएकाहरूलाई उद्धार गरी प्रदेश अस्पताल पुतलीबजार पठाइएको छ। घाइतेमध्ये केहीको अवस्था मध्यम रहेको प्रहरीले जनाएको छ।
घाइते हुनेमा बिरुवा गाउँपालिका–४ का ८ वर्षीया एन्जल नेपाली, १३ वर्षीय कृष्चल दर्जी, ५० वर्षीय मानसिङ गुरुङ, ५९ वर्षीया दालमाया गुरुङ र ६५ वर्षीया रेमकुमारी बस्याल रहेका छन्। त्यस्तै पुतलीबजार–७ की ५७ वर्षीया चन्द्र सुब्बा गुरुङ, ३३ वर्षीया शर्मीला नेपाली र उनका साढे २ वर्षका छोरा कृष्ण नेपाली, कास्की पोखरा–११ की ६० वर्षीया विष्णुमाया गुरुङ, पोखरा–१५ की ६० वर्षीया बिमला गुरुङ तथा पोखरा–१७ की ५६ वर्षीया सिता वाग्ले पनि घाइते भएका छन्।
उद्धारका लागि प्रहरी निरीक्षकसहित १६ जनाको टोली घटनास्थलमा खटिएको थियो। दुर्घटनाको कारणबारे थप अनुसन्धान भइरहेको प्रहरीले जनाएको छ।