सुरभिमा लेखनाथ जयन्ती र स्रष्टा सम्मान

पुस १५, काठमाडौँ ।
कविशिरोमणि लेखनाथ पौड्यालको १४२ आँै जन्मजयन्तीको अवसरमा सुरभि साहित्य प्रतिष्ठानले गोकर्णेश्वरमा स्रष्टा सम्मान तथा लेखनाथसम्बन्धी कविता वाचन सम्पन्न गरेको छ । ‎सुरभि साहित्य प्रतिष्ठानका अध्यक्ष बाजुराम पौडेलको अध्यक्षता र गोकर्णेश्वर न पा ८ का वडाअध्यक्ष नन्दलाल श्रेष्ठको प्रमुख आतिथ्यमा सम्पन्न योे कार्यक्रममा विशेष अतिथिमा सुरभिका संरक्षकद्वय गोविन्द घिमिरे वेदमणि र युवराज मैनाली रहनुभएको थियो भने अतिथिमा ठाकुरप्रसाद शर्मा भण्डारी, महेन्द्र चालिसे, राजनप्रसाद नेउपाने, सुशीला प्रधानाङ्ग, गोपालकुमार मैनाली र खोलाघरे साहिँलो रहनुभएको थियो । यसै कार्यक्रममा कुश्मा, पर्वतका स्रष्टा शान्तिनारायण श्रेष्ठ र गीतकार वसन्तराज अज्ञातलाई सुरभि सद्भावना पुरस्कार प्रदान गरिएको थियो ।
लेखनाथ पौडेलको तस्बिरमा माल्यार्पण गरेपछि सुरु भएको कार्यक्रममा स्वागत प्रतिष्ठानका सहसचिव मेनका पोख्रेल आचार्यले गर्नुभयो । प्रतिष्ठानका उपाध्यक्ष परशुराम पराशरले पुरस्कृत प्रतिभाद्वयको परिचय दिनुभएको थियो । कार्यक्रमका प्रमुख अतिथि नन्दलाल श्रेष्ठले सुरभिले यस क्षेत्रमा साहित्यिक कार्यक्रम गरेर, साहित्यकारहरूलाई उपस्थित गराएर पवित्र पारेको कुरा व्यक्त गर्दै साहित्यकारहरू र साहित्यका क्षेत्रमा आफूले सहयोग गरिरहेको र अझै गरिरहने वचन दिनुभयो । वहाँले २०८२ सालभित्रैमा सुरभि साहित्य प्रतिष्ठानको आफ्नै कार्यालय र कार्यक्रम गर्ने हल बन्ने कुरा बताउनुभयो । तर यसका लागि सबैले पहल गर्नुपर्ने छ भन्नुभयो । वहाँले साहित्यकारहरूले राजनीति गर्ने व्यक्ति र स्थानीय नेतृत्वलाई व्यङ्ग्य गर्दा मन चसक्क हुने कुरा बताउँदै सबैलाई एउटै तुलोमा नजोख्नुहोला भन्नुभयो ।
पुरस्कृतका तर्फबाट बोल्दै शान्तिनारायण श्रेष्ठले हामीजस्तो टाढाको मान्छेलाई सम्झेकोमा सुरभिलाई धन्यवाद भन्नुभयो । वहाँले आफ्ना रमाइला रमाइला गजल र मुक्तकहरूसमेत सुनाउनुभयो । युवराज मैनालीले शुभकामना मन्तव्य, सभाध्यक्ष तथा सुरभिका अध्यक्ष बाजुराम पौडेलले लेखनाथको जीवनी, कृतिहरूबारे सङ्क्षिप्त जानकारी दिँदै नेपाली साहित्यको आधुनिक कालका आरम्भकर्ता पनि लेखनाथ नै हुन् भन्दै पुरस्कृत दुवै प्रतिभा र सहभागीहरुलाई हार्दिक धन्यवाद दिँदै शिखरिणी छन्दमा आफ्नो रचना सुनाएर सभा समापन गर्नुभयो ।
यस कार्यक्रममा रचनावाचन गर्नेहरूमा महेश्वर खनाल, सुशील आचार्य, रत्ननिधि रेग्मी, अल्फिफोहेन फाक्लुप्पा, वासुदेव पौडेल, खोलाघरे साहिँलो, शारदा पराजुली, प्रतीक धिमाल, गोपालकुमार मैनाली, रामचन्द्र खतिवडा, परशुराम पराशर, सरिता घिमिरे, राजनप्रसाद नेउपाने, मेनका पोख्रेल, ठाकुरप्रसाद भण्डारी, सुशीला प्रधानाङ्ग, विमल अर्याल, गणेश खतिवडा, युवराज मैनाली, बाजुराम पौडेल, विमल अर्याललगायत कविहरूले कविशिरोमणि लेखनाथसँग सम्बन्धित कविता वाचन गर्नुभएको थियो । दिउँसो १२ बजे सुरु भएको यो कार्यक्रमको सञ्चालन प्रतिष्ठानका सचिव अच्युत घिमिरेले गर्नुभएको थियोे ।