काठमाडौँ । जारी विश्वकप फुटबलअन्तर्गत शनिबार भएको रोमाञ्चक प्रतिस्पर्धामा इजिप्ट र इरान ले १–१ गोलको बराबरी खेलेका छन्। पेनाल्टीको अवसर सदुपयोग गर्न नसक्नु र इन्जुरी समयमा गरेको गोल अफसाइड ठहरिनु इरानका लागि महँगो सावित भयो।
खेलको पाँचौँ मिनेटमै इजिप्टका मोहमद साबेरले गोल गर्दै टोलीलाई सुरुवाती अग्रता दिलाएका थिए। तर, इरानले त्यसको जवाफ दिन धेरै समय लगाएन।
११औँ मिनेटमा इरानले पेनाल्टीको अवसर पाएको थियो। तर, स्ट्राइकर मेह्दी तारेमी गोल गर्न असफल भए। त्यसको तीन मिनेटपछि, १४औँ मिनेटमा रामिन रेजाइनले गोल गर्दै खेललाई १–१ को बराबरीमा पुर्याए।
खेलको अन्तिम समयमा इरानले विजयी गोल गरेको जस्तो देखिए पनि भिडियो सहायक रेफ्री (VAR) को परीक्षणपछि उक्त गोल अफसाइड घोषित गरियो र खेल बराबरीमै टुंगियो।
यस नतिजासँगै समूह ‘जी’मा इजिप्ट पाँच अंकसहित दोस्रो स्थानमा कायम रहेको छ। समान पाँच अंक नै जोडेको बेल्जियम गोलअन्तरका आधारमा समूह विजेता बनेको छ।
उता, तीन अंकसहित तेस्रो स्थानमा रहेको इरानको नकआउट चरण प्रवेशको सम्भावना भने अझै जीवित रहेको छ। उत्कृष्ट तेस्रो स्थानमा रहने टोलीमध्ये एक बन्न सके इरानले अन्तिम–३२ मा स्थान बनाउन सक्छ।