काठमाण्डौ । राष्ट्रिय स्वतन्त्र पार्टी (रास्वपा) को महाधिवेशनमा पहिलो चरणको मतदान सकिएको छ। बिहीबार मध्याह्न साढे १२ बजे मतदान सकिएको केन्द्रीय निर्वाचन आयोगले जनाएको छ।
आयोगले मध्याह्न १२ बजेसम्म मतदान गर्ने समय तोकेको थियो। गए राति १२ बजेदेखि मतदान सुरु भएको थियो।
रास्वपा प्रवक्ता मनिष झाले तीन हजार एक सयको मत खसेको प्रारम्भिक विवरण रहेको बताएका छन् । रास्वपा महाधिवेशनमा चार हजारभन्दा बढी प्रतिनिधि सहभागी थिए।
बिहीबार मध्याह्न रास्वपा सभापति रवि लामिछाने पनि मतदान गर्न पुगेका थिए। उनले अन्तिम समयमा मतदान गरेका थिए।
रास्वपा विधानअनुसार, पहिलो चरणमा सभापति र केन्द्रीय सदस्यका लागि निर्वाचन हुन्छ। सभापतिमा लामिछाने निर्विरोध निर्वाचित भएका थिए भने केन्द्रीय सदस्यका लागि मतदान भएको हो।
नवनिर्वाचित केन्द्रीय सदस्यबाटै पदाधिकारी चयन गर्ने व्यवस्था रहेको छ। केन्द्रीय सदस्यको मतगणना सम्पन्न भएपछि पदाधिकारी निर्वाचन प्रक्रिया सुरु हुने केन्द्रीय निर्वाचन आयोगका प्रमुख भुवन केसीले जानकारी दिए।