काठमाडौँ । फिफा विश्वकप २०२६ अन्तर्गत समूह ‘एच’ को दोस्रो खेलमा केप भर्डे र उरुग्वेले २–२ गोलको रोमाञ्चक बराबरी खेल्दै अंक बाँडेका छन्। सोमबार बिहान मियामी स्टेडियममा भएको खेलमा विश्वकपमा पहिलो पटक सहभागी भएको केप भर्डेले उत्कृष्ट प्रदर्शन गर्दै पूर्व विश्वकप विजेता उरुग्वेलाई जितबाट रोकेको छ।
पश्चिम अफ्रिकाको तट नजिक अटलान्टिक महासागरमा अवस्थित करिब पाँच लाख जनसंख्या भएको केप भर्डे क्षेत्रफलका हिसाबले पनि सानो राष्ट्र हो। सीमित स्रोतसाधनका बाबजुद विश्व फुटबलको सबैभन्दा ठूलो मञ्च फिफा विश्वकपमा देखाएको प्रदर्शनले फुटबल समर्थकहरूको ध्यान तानेको छ।
खेलको २१औँ मिनेटमा मिडफिल्डर केभिन पिनाले करिब २५ यार्ड टाढाबाट प्रहार गरेको शानदार फ्री–किक गोलमा परिणत गर्दै केप भर्डेलाई अग्रता दिलाए। उक्त गोल विश्वकप इतिहासमा केप भर्डेको पहिलो गोलसमेत बन्यो।
उरुग्वेले पहिलो हाफको अन्त्यतिर प्रभावशाली पुनरागमन गर्यो। ४४औँ मिनेटमा म्याक्सिमिलियानो आराउजोले बराबरी गोल गरे भने पहिलो हाफको अतिरिक्त समयमा अगस्टिन कानोबियोले गोल थप्दै उरुग्वेलाई २–१ को अग्रता दिलाए।
दोस्रो हाफमा पनि केप भर्डेले संघर्ष जारी राख्यो। ६१औँ मिनेटमा हेलियो वरेलाले उत्कृष्ट प्रहारमार्फत गोल गर्दै खेललाई २–२ को बराबरीमा पुर्याए। त्यसपछि दुवै टोलीले निर्णायक गोलको प्रयास गरे पनि थप गोल हुन सकेन।
यो नतिजापछि समूह ‘एच’ मा स्पेन दुई खेलबाट चार अंकसहित शीर्ष स्थानमा रहेको छ। उरुग्वे र केप भर्डेको समान दुई–दुई अंक छ भने साउदी अरेबिया एक अंकका साथ पछाडि छ।
पहिलो खेलमा स्पेनलाई बराबरीमा रोकेर चर्चा कमाएको केप भर्डेले उरुग्वेविरुद्ध पनि अंक बटुल्दै नकआउट चरण पुग्ने सम्भावना जीवित राखेको छ। सानो राष्ट्र भए पनि विश्वकपमा उसले देखाएको आत्मविश्वास र जुझारुपनाले धेरैलाई प्रभावित बनाएको छ।