सिन्धुली। मदन भण्डारी राजमार्गअन्तर्गत सिन्धुलीको दुधौली नगरपालिका–२ गागनमा आज बिहान यात्रुवाहक बस र मोटरसाइकल एकापसमा ठोक्किँदा एकजनाको मृत्यु भएको छ भने एकजना गम्भीर घाइते भएका छन्।
जिल्ला प्रहरी कार्यालय, सिन्धुलीका डीएसपी सूर्यप्रकाश सवेदीका अनुसार पोखराबाट कटारीतर्फ जाँदै गरेको बस र डकाहाबाट झुगातर्फ आइरहेको मोटरसाइकल ठोक्किँदा दुधौली नगरपालिका–३का २५ वर्षीय महेश कुमरको घटनास्थलमै मृत्यु भएको हो।
दुर्घटनामा गम्भीर घाइते भएका कमलामाई नगरपालिका–१४ चन्दनपुरका २५ वर्षीय दिपेश कुमरको दुधौली नगर अस्पतालमा उपचार भइरहेको प्रहरीले जनाएको छ।
दुर्घटनापछि बस चालक—उदयपुरको कटारी नगरपालिका–३का श्यामकुमार भट्टराई—फरार रहेका छन्। उनको खोजी जारी रहेको जिल्ला प्रहरीले जानकारी दिएको छ।