काठमाडौँ । सरकारले सशस्त्र प्रहरी बल, नेपाल (एपीएफ)को महानिरीक्षक (आईजीपी) पदमा अतिरिक्त महानिरीक्षक (एआईजी) नारायणदत्त पौडेललाई बढुवा गरेको छ।
प्रधानमन्त्री तथा मन्त्रिपरिषद्को कार्यालय, सिंहदरबारमा सोमबार बसेको मन्त्रिपरिषद् बैठकले पौडेललाई संगठनको सर्वोच्च नेतृत्वमा नियुक्त गर्ने निर्णय गरेको हो। मन्त्रिपरिषद्को निर्णयसँगै सशस्त्र प्रहरी बलको नेतृत्वमा नयाँ अध्याय सुरु हुने भएको छ।
हालका महानिरीक्षक राजु अर्याल चारवर्षे कार्यकाल पूरा गरी आगामी वैशाख १८ गते अनिवार्य अवकाशमा जाँदैछन्। अर्यालको कार्यकाल समाप्त हुन लागेसँगै सरकारले नेतृत्व हस्तान्तरणको प्रक्रिया अघि बढाउँदै पौडेललाई उत्तराधिकारीका रूपमा अघि सारेको हो।
सशस्त्र प्रहरी बलको नेतृत्व सम्हाल्न लागेका पौडेल संगठनभित्र अनुभवी र नेतृत्वदक्ष अधिकारीका रूपमा चिनिन्छन्। सीमा सुरक्षा, विपद् व्यवस्थापन, आन्तरिक सुरक्षा समन्वय तथा संगठनात्मक सुदृढीकरणका क्षेत्रमा उनको भूमिकालाई महत्त्वपूर्ण मानिन्छ।
नयाँ नेतृत्वसँगै सशस्त्र प्रहरी बलको कार्यसम्पादन, रणनीतिक प्राथमिकता र संगठनात्मक सुधारका कार्यक्रमले थप गति लिने अपेक्षा गरिएको छ। नेपालको सीमा सुरक्षा, राष्ट्रिय विपद् व्यवस्थापन र संवेदनशील सुरक्षा जिम्मेवारी निर्वाह गर्ने सशस्त्र प्रहरी बलमा नेतृत्व परिवर्तनलाई सुरक्षा संयन्त्रभित्र महत्त्वपूर्ण घटनाक्रमका रूपमा हेरिएको छ।
