ओम समाज डेन्टल अस्पताल र बुढानीलकण्ठ सामाजिक युवा क्लबद्वारा एकै दिन दुई स्थानमा निःशुल्क स्वास्थ्य शिविर, सयौं लाभान्वित

काठमाडौं ।
राजन थापा
सामाजिक उत्तरदायित्वलाई व्यवहारमा उतार्दै ओम समाज डेन्टल अस्पताल र बुढानीलकण्ठ सामाजिक युवा क्लबले एकै दिन काठमाडौंका दुई फरक स्थानमा निःशुल्क स्वास्थ्य तथा दन्त परीक्षण शिविर सञ्चालन गरेका छन्। बुढानीलकण्ठ र चाबहिल चोकमा आयोजित शिविरबाट सयौं सर्वसाधारणले प्रत्यक्ष रूपमा स्वास्थ्य सेवा प्राप्त गरेका छन्।
बुढानीलकण्ठ सामाजिक युवा क्लबले प्रत्येक महिनाको तेस्रो हप्तामा सञ्चालन गर्दै आएको नियमित सामाजिक अभियान अन्तर्गत आयोजित शिविरमा दन्त परीक्षण, मुख स्वास्थ्य सम्बन्धी परामर्श तथा आवश्यक सुझाव प्रदान गरिएको थियो। शिविरमा विशेषज्ञ चिकित्सक र स्वास्थ्यकर्मीहरूको टोलीले सेवा दिएको थियो।
बुढानीलकण्ठमा आयोजित कार्यक्रममा नेपाल कम्युनिष्ट पार्टीका केन्द्रीय सदस्य तथा काठमाडौं निर्वाचन क्षेत्र नं. ४ का पूर्व उम्मेदवार इन्द्रकुमार भुसाल प्रमुख अतिथिका रूपमा उपस्थित थिए। कार्यक्रममा विभिन्न राजनीतिक दलका प्रतिनिधि, सामाजिक अभियन्ता, बुद्धिजीवी, स्थानीय अगुवा तथा सर्वसाधारणको उल्लेखनीय सहभागिता रहेको थियो।
शिविर व्यवस्थापक धनप्रसाद घिमिरेले स्वास्थ्य सेवा प्रत्येक नागरिकको मौलिक आवश्यकता भएको उल्लेख गर्दै यस्ता अभियानलाई अझ व्यापक बनाइने बताए। उनले भने, “समाजका धेरै नागरिक सामान्य स्वास्थ्य परीक्षण र दन्त उपचारको पहुँचबाट अझै टाढा छन्। त्यस्ता नागरिकहरूलाई सेवा दिन अस्पतालबाट समुदायसम्म पुग्ने अभियानलाई हामीले प्राथमिकता दिएका छौं। सेवा नै हाम्रो धर्म हो भन्ने विश्वासका साथ हामी निरन्तर जनताको बीचमा पुगेका छौं। जब कुनै ज्येष्ठ नागरिक उपचार पाएर मुस्कुराउँदै घर फर्कनुहुन्छ, त्यही क्षण हाम्रो सबैभन्दा ठूलो उपलब्धि बन्छ।”
कार्यक्रमलाई सम्बोधन गर्दै बुढानीलकण्ठ सामाजिक युवा क्लबका अध्यक्ष सन्दीप श्रेष्ठले स्वास्थ्य सेवामा सबैको समान पहुँच सुनिश्चित हुनुपर्ने बताए। उनले भने, “समाजका कुनै पनि नागरिक उपचारको अभावमा पीडित बन्न नपरोस् भन्ने हाम्रो चाहना हो। दाँत तथा मुख स्वास्थ्यप्रति जनचेतना अभिवृद्धि गर्दै नागरिकलाई प्रत्यक्ष सेवा प्रदान गर्न हामीले ओम समाज डेन्टल अस्पतालसँग सहकार्य गरेका हौं।”
क्लबको कार्यसमितिमा अध्यक्ष सन्दीप श्रेष्ठ, उपाध्यक्ष समीर श्रेष्ठ, सचिव प्रशान्त श्रेष्ठ, सहसचिव आयुष गिरी, कोषाध्यक्ष संस्कार बान तथा सदस्यहरू मनिष श्रेष्ठ, कृपा केसी, सुदीप बी.के., सबिन श्रेष्ठ, सुजल खड्का र आशना मगर रहेका छन्। सम्पूर्ण पदाधिकारी तथा सदस्यहरूको सक्रिय सहभागिताले कार्यक्रम सफल बनेको आयोजकले जनाएको छ।
कार्यक्रममा बोल्ने वक्ताहरूले ओम समाज डेन्टल अस्पतालको सामाजिक योगदानको उच्च प्रशंसा गरेका थिए। एक वक्ताले भने, “आज अस्पताल धेरै छन्, तर जनताको मनमा बस्न सक्ने संस्था थोरै छन्। ओम समाज डेन्टल अस्पतालले सडकदेखि समाजका प्रत्येक तहसम्म विश्वास जित्न सफल भएको छ। सेवाभाव र समर्पणका कारण यसले छुट्टै पहिचान बनाएको छ।”
यसैबीच, चाबहिल चोकमा प्रत्येक महिनाको तेस्रो हप्तामा सञ्चालन हुँदै आएको नियमित निःशुल्क स्वास्थ्य तथा दन्त शिविरमा पनि उल्लेखनीय सहभागिता रहेको थियो। शिविरको सम्पूर्ण व्यवस्थापन गर्दै आएकी सन्तोषी के सि ले मानव सेवाभन्दा ठूलो धर्म अरू कुनै नभएको बताइन्। उनले भनिन्, “शिविरमा आउने ज्येष्ठ नागरिक, श्रमिक तथा विपन्न नागरिकहरूको अनुहारमा देखिने आशा र विश्वासले हामीलाई निरन्तर सेवामा समर्पित हुन प्रेरित गर्छ। उनीहरूको खुशी र आशीर्वाद नै हाम्रो सबैभन्दा ठूलो पुरस्कार हो।”
ओम समाज डेन्टल अस्पतालका सञ्चालक समितिका उपाध्यक्ष तथा सामाजिक व्यक्तित्व रामेश्वर जंग केसीले स्वास्थ्य सेवा केवल व्यवसाय नभई मानवताको सेवा भएको बताए। उनले भने, “आर्थिक अभावका कारण आधारभूत उपचारबाट वञ्चित हुने नागरिकहरूको पीडा हामीले नजिकबाट महसुस गरेका छौं। त्यसैले अस्पतालको सेवा भवनभित्र सीमित नराखी गाउँ, टोल र समुदायसम्म विस्तार गरिरहेका छौं। कुनै आमाको मुस्कान उपचारको अभावमा हराउन नपरोस्, कुनै बुबा पीडामा बाँच्न बाध्य नहोस् र कुनै बालबालिकाको भविष्य सामान्य स्वास्थ्य समस्याका कारण प्रभावित नहोस् भन्ने हाम्रो लक्ष्य हो।”
लामो समयदेखि विभिन्न सामाजिक संस्था, युवा क्लब, विद्यालय तथा स्थानीय तहसँग सहकार्य गर्दै आएको ओम समाज डेन्टल अस्पतालले समुदाय केन्द्रित स्वास्थ्य सेवाको अभियानलाई अझ सशक्त बनाउँदै लगेको जनाएको छ।
सामाजिक अभियन्ता तथा पत्रकार राजन थापाले यस्ता कार्यक्रम समाजका लागि प्रेरणादायी रहेको उल्लेख गर्दै भने, “आज समाजलाई भाषणभन्दा बढी सेवाको आवश्यकता छ। जनताको पीडामा साथ दिने, स्वास्थ्य सेवाको पहुँच नपुगेका नागरिकसम्म पुग्ने र व्यवहारबाट मानवता स्थापित गर्ने संस्था नै समाजको वास्तविक सम्पत्ति हो। ओम समाज डेन्टल अस्पतालले सेवा, समर्पण र विश्वासका माध्यमबाट सामाजिक उत्तरदायित्वको उत्कृष्ट उदाहरण प्रस्तुत गरेको छ।”