कांग्रेस केन्द्रीय समिति बैठक सकिएको छ। बैठकले तीन प्रस्ताव पारित गरेको छ।
१४ औं महाधिवेशनको पूर्वसन्ध्यामा बसेको पार्टी बैठकले महामन्त्री शशांक कोइराला, पूर्णबहादुर खड्काको प्रतिवेदन, कोषाध्यक्ष सीतादेवी यादवको आर्थिक प्रतिवेदन र उपसभापति विमलेन्द्र निधिले पेस गरेको नीति अनुसन्धान प्रतिस्ठानको प्रतिवेदन सर्वसम्मत पारित गरेको हो।
आज केन्द्रीय कार्यालय सानेपामा बसेको बैठकले राजनीतिक, आर्थिक तथा नीति अनुसन्धान प्रशिक्षण प्रतिष्ठानको प्रतिवेदन पारित गरेको हो। बैठक पछि पत्रकार सम्मेलनमा प्रवक्ता विश्वप्रकाश शर्माले महामन्त्रीद्वयको तर्फबाट महामन्त्री पूर्णबहादुर खड्काले बैठकमा सांगठानिक प्रतिवेदन पेस गरेको जानकारी दिए।
उक्त प्रतिवेदन केही रायसहित पारित गरेको शर्माले बताए। यस्तै कोषाध्यक्षले प्रस्तुत गरेको लेखासम्बन्धी प्रतिवेदन पनि पेस भएर पारित भएको शर्माले जानकारी दिए। प्रतिवेदनअनुसार कांग्रेससँग हालसम्म १० करोडभन्दा बढी रकम कोषमा संचित रहेको उल्लेख गरिएको छ।
यस्तै पार्टीको नीति अनुसन्धान, प्रशिक्षण प्रतिष्ठानको प्रतिवेदन पेस भएर पारित भएको छ। विभिन्न समयमा आवश्यकता अनुसार गरिएको विधानको परिमार्जन, संशोधन लगायतका विषय पनि बैठकबाट अनुमोदन गरिएको शर्माले बताए। आजको बैठकमा नेता रामचन्द्र पौडेल र प्रकाशमान सिंह भने अनुपस्थित थिए।