घिसिङको ‘स्वर्णिम चार वर्ष’ पूरा : राखेप सदस्य–सचिवको भावुक बिदाइ
काठमाडौँ — राष्ट्रिय खेलकुद परिषद् (राखेप) का सदस्य–सचिव टंकलाल घिसिङले शुक्रबार चारवर्षे कार्यकाल पूरा गरी बिदा लिएका छन्। २०७८ मंसिर १३ गते खेलकुद प्रशासनको ‘हट सिट’ सम्हालेका घिसिङले पूर्ण कार्यकाल पूरा गर्दै परिषद्बाट औपचारिक बिदा लिएका हुन् ।
उनीसँगै बोर्ड सदस्य अञ्जन धमला, बिना श्रेष्ठ, दीपेन्द्र विष्ट, जनक बर्तौला, मोहम्मद फाजिल र प्रकाशकुमार कुसारीलाई पनि बिदा गरिएको थियो। बिदाइको अवसरमा सदस्य–सचिव घिसिङले ‘मिसन–२०२६’ अन्तर्गत तयारीरत खेलाडी तथा प्रशिक्षकलाई किट्स समेत वितरण गरे।
राष्ट्रिय टिम तयारी निर्देशक दीपक विष्टले घिसिङको कार्यकाललाई ‘स्वर्णिमकाल’ भन्दै प्रशंसा गरे।
“इतिहास लेखिने होइन, बनाइने हो,” उनले भने, “उहाँको नेतृत्वमा भएका उपलब्धिहरू नेपाली खेलकुदका लागि ऐतिहासिक र गौरवपूर्ण छन्।”
ओलम्पिक संरचनामा पहिलो पदकदेखि एसियाडसम्मको सफलता
घिसिङको नेतृत्वमा कराँते, कबड्डी, खो खो, उसु, तेक्वान्दो, क्रिकेट, भलिबललगायतका खेलले महत्त्वपूर्ण उपलब्धि हासिल गरेका छन्। नेपालले ओलम्पिक संरचनामै पहिलो पदक पायो—पारा तेक्वान्दोकी पलेशा गोबर्धनले पेरिस पारा ओलम्पिक २०२४ मा कांस्य पदक जितेकी थिइन्।
हाङचाउ एसियाडमा कराँतेकी एरिका गुरुङको रजत तथा महिला कबड्डी टिमको कांस्यले पनि नेपाली खेलकुदको २५ वर्षपछि उचाइ बढाएको थियो। पारा एसियाडको पदक समेत घिसिङकै कार्यकालमा हात लागेको अर्को उपलब्धि हो।
कोरोनापछिको ठप्प खेलकुदलाई ‘चलायमान’ बनाउने जिम्मेवारी
कोरोना महामारीपछि सुस्ताएको खेलकुदलाई पुनः गतिशील बनाउने जिम्मेवारी पाएका घिसिङले १९ औं एसियाड तयारीमार्फत आफ्नो यात्रा सुरु गरेका थिए। एसियाड एक वर्ष पछाडि धकेलिँदा नेपालले तयारीका लागि थप समय पायो। त्योबीच उनले नवौं राष्ट्रिय खेलकुद आयोजना गरी आधारभूत संरचना मजबुत बनाए।
राखेपका पूर्व सदस्य–सचिव युवराज लामाले राजनीतिक दबाब र विवादबीच पनि घिसिङले कार्यकाल सफलतापूर्वक पूरा गरेको बताए।
“यी उपलब्धिहरू घिसिङको नेतृत्वमा बनेको प्रेरणादायी अध्याय हो,” उनले भने।
संस्थागत सुधारका ‘कडा’ कदम
घिसिङको कार्यकालमा वर्षौंदेखि रोकिएको राखेप कर्मचारीको बढुवा प्रक्रिया निष्कर्षमा पुग्यो। कर्मचारी संघकी अध्यक्ष सरस्वती केसीले “लामो समयपछि बढुवा समस्याको जड नै फुकेको” बताइन्।
त्यस्तै, २०९ भन्दा बढी दर्ता भएका राष्ट्रिय खेल संघलाई घटाएर ६३ मा झार्नु, समान प्रकृतिका संघहरू एकीकृत गर्नु, निष्क्रिय संघ खारेजी गर्नु र आवधिक निर्वाचनलाई कानुनी बाध्यतामा रूपान्तरण गर्नु उनको प्रमुख सुधार मानिन्छ।
नेसनल हाइपर्फमेन्स सेन्टरको स्थापना, एन्थ्रोपोमेट्रिक अनुसन्धान, खेलाडी सम्मान तथा पुरस्कार कार्यविधि निर्माण, राष्ट्रपति रनिङ सिल्ड, विद्यालय तहका जुनियर राष्ट्रिय तथा विश्वविद्यालय खेलकुद प्रतियोगिताको थालनी पनि उनका कार्यकालका उल्लेखनीय काम हुन् ।
‘मिसन–२०२६’ : एसियाडमा ‘पहिलो स्वर्ण’ लक्ष्य
१९ औं एसियाडबाट उत्साहित भएर घिसिङले आगामी जापान एसियाडका लागि ‘मिसन–२०२६’ सुरुआत गरे—नेपाललाई पहिलो स्वर्णसहित दुई अंकमा पदक दिलाउने लक्ष्यसहित।
चर्को विवाद पनि उही घिसिङकै कार्यकालमा
उनको कार्यकाल उपलब्धि मात्रै होइन, केही विवादले पनि घेरेको छ। पूर्व प्रधानमन्त्री केपी शर्मा ओली नेतृत्वको सरकार तथा खेलकुदमन्त्रीसँग ट्युनिङ नमिल्दा १० औं राष्ट्रिय खेलकुद पटक–पटक सर्दै आयोजना हुनसक्दा समस्या पैदा भयो। एनओसी विवादमा समेत समाधान निकाल्न नसकेको आलोचना आयो।
एनओसीका पूर्वमहासचिव निलेन्द्रराज श्रेष्ठले भने, “उहाँले प्रयास गर्नुभयो, तर माथिल्लो तहको अनिच्छा बाधक बन्यो।”
भावुक बिदाइ, धन्यवादसहितको अन्त्य
बिदाइ समारोहमा भावुक बनेका घिसिङले खेलाडी, प्रशिक्षक र कर्मचारीलाई धन्यवाद दिए।
“सबैको सहकार्यका कारण अभूतपूर्व सफलता हासिल गर्न सकियो,” उनले भने।