काठमाडौँ – ३२ लाख घुस लिएको आरोपसहित अडियो सार्वजनिक भए पनि सत्ताको संरक्षणमा लामो समय अनुसन्धानबाट बाहिर रहेका पूर्वभूमि व्यवस्थामन्त्री बलराम अधिकारीमाथि अन्ततः अनुसन्धान सुरु हुन लागेको छ ।
एमालेका वरिष्ठ नेता र पूर्वमन्त्री अधिकारीले पार्टी अध्यक्षसमेत रहेका प्रधानमन्त्री केपी ओलीको प्रभावमा लामो समय अनुसन्धानबाट बच्दै आएका थिए । तर, जेन–जी आन्दोलनले ओलीलाई सत्ता बाहिर धकेलेपछि अब नयाँ सरकारको नेतृत्वमा पूर्वप्रधानन्यायाधीश सुशीला कार्की पुगेकी छिन्। आन्दोलनका अगुवा, सहिदका परिवार र घाइतेहरूले अख्तियारका प्रमुख प्रेम राईसहित सबै आयुक्तको राजीनामा माग्दै आएका छन्, जसले अनुसन्धान प्रक्रियामा गति थपेको विश्लेषकहरूको भनाइ छ ।
यसैबीच, अख्तियार दुरुपयोग अनुसन्धान आयोगले सात जनाविरुद्ध मुद्दा दायर गर्दै तत्कालीन सचिव अर्जुनप्रसाद पोखरेल र पूर्वमन्त्री अधिकारीलाई अनुसन्धानमा तान्ने निर्णय गरेको छ । अधिकारीमाथि बिचौलिया सुजनसँग ३२ लाख घुस लिएको आरोप छ भने पोखरेलमाथि पाँच लाख नगदसहित १० हजार मूल्यका सामान, रक्सी र दुई वनकुखुरा लिएको आरोप छ ।
अख्तियारले छुट्टै मिसिल खडा गरी अनुसन्धान अधिकृत तोकी थप अनुसन्धान अघि बढाउने निर्णय गरेको छ । घुस प्रकरणमा संलग्न बिचौलियाले पनि अधिकारीलाई घुस दिएको खुलासा गरेका थिए भने मुद्दा दायर भएका अन्य पूर्वमन्त्रीले समेत अधिकारीको संलग्नता पुष्टि गरेका छन् ।
अख्तियार स्रोतका अनुसार, “अधिकारीमाथि छानबिन चलिरहेको छ। थप प्रमाणहरू प्राप्त भएपछि उनीविरुद्ध दोस्रो चरणमा मुद्दा दायर गर्ने तयारी छ ।”
यसले संकेत गर्छ कि ३२ लाख घुस प्रकरणमा जोडिएका पूर्वमन्त्री बलराम अधिकारी अब अनुसन्धानको पूर्ण दायरामा प्रवेश गर्दैछन्।